भ्रमरगीत-सार/२१३-ऊधो स्यामहिं तुम लै आओ
ऊधो! स्यामहिं तुम लै आओ।
ब्रजजन-चातक प्यास मरत हैं, स्वातिबूँद बरसाओ॥
घोष-सरोज भए हैं संपुट, दिनमनि ह्वै बिगसाओ।
ह्याँ तें जाव बिलम्ब करौ जनि, हमरी दसा सुनाओ॥
जौ ऊधो हरि यहाँ न आवैं, हमको तहाँ बुलाओ।
सूरदास प्रभु वेगि मिलाए संतन में जस पाओ॥२१३॥
ऊधोजू! जोग तबहिं हम जान्यो।
जा दिन तें सुफलकसुत के संग रथ ब्रजनाथ पलान्यो॥
जा दिन तैं सब छोह-मोह मिटि सुत-पति-हेत भुलान्यो।
तजि माया संसारसार की ब्रजबनितन ब्रत ठान्यो॥
नयन मुँदे, मुख रहे मौन धरि, तन तपि तेज सुखान्यो।
नंदनँदन-मुख मुरलीधारी, यहै रूप उर आन्यो॥
सोउ सँजोग जिहि भूलैं हम कहि तुमहूँ जोग बखान्यो।
ब्रह्मा पचि पचि मुए प्रान तजि तऊ न तिहि पहिंचान्यो॥