यह पृष्ठ प्रमाणित है।
११५
भ्रमरगीत-सार
राग केदारो
हर को तिलक[१], हरि! चित को दहत।
कहियत है उडुराज अमृतमय, तजि सुभाव मोकों बन्हि बहत॥
छपा न छीन होय, मेरी सजनी! भूमि-डसन-रिपु[२] काधौं बसत।
ससि नहिं गमन करै पच्छिम दिसि, राहु ग्रसत गहि, मोकों न गहत[३]॥
ऐसोइ ध्यान धरत तुम, दधिसुत! मुनि महेस जैसी रहनि रहत[४]।
सूरदास प्रभु मोहन मूरति चितै जाति पै चित न सहत[५]॥२९७॥
ए सखि! आजु की रैनि को दुख कह्यो न कछु मोपै परै।
मन राखन[६] को बेनु लियो कर, मृग थाके उडुपति न चरै[७]॥
वाही प्राननाथ प्यारे बिनु सिव-रिपु[८]-बान नूतन जो जरै।
अति अकुलाय बिरहिनी ब्याकुल भूमि-डसन-रिपु भख न करै॥
अति आतुर ह्वै सिंह लिख्यो कर जेहि भामिनी को करुन टरै।
सूरदास ससि को रथ चलि गयो, पाछे; तें रबि उदय करै॥२९८॥
राग मलार
देखौ माई! नयनन्ह सों घन हारे।
बिन ही ऋतु बरसत निसिबासर सदा सजल दोउ तारे॥
- ↑ हर को तिलक=शिव का शिरोभूषण चन्द्र।
- ↑ भूमि-डसन-रिपु=साँप।
- ↑ राहु......गहत=इसको राह पकड़ लेता जिसमें यह हमें न ग्रसता या कष्ट देता।
- ↑ मुनि महेस...रहत=अर्थात् अचल आसन मारकर, ध्यान लगाकर।
- ↑ चितै जाति...सहत=ध्यान में उनकी मूर्ति देखती हूँ, पर ब्याकुलता से देखा नहीं जाता।
- ↑ मन राखन को=मन बहलाने के लिए।
- ↑ चरै=चलता है।
- ↑ सिव-रिपु=कामदेव।
१३
