धोरन दीजिए धीर हिए कुलकानि को आजु बिगारन दीजिए।
मार दीजिए लाज सबै 'हरिचंद' कलंक पसारन दीजिए॥
चार चवाइन कों चहुँ ओर सों सोर मचाइ पुकारन दीजिए।
छॉडि सँकोचन चंद-मुखै भरि लोचन आजु निहारन दीजिए॥
क्योंकि---
ये दुखियों सदा रोयो करै बिधना इनको कबहूँ न दियो सुख।
झूठहीं चार चवाइन के डर देख्यौ कियो उनहीं को लिये रुख॥
छॉड़यौ सबै 'हरिचंद' तऊ न गयो जिय सों यह हाय महा दुख।
प्रान बचै केहि भॉतिन सो तरसै जब दूर सों देखिबे कों मुख॥
( रोती है )
बन०---( ऑसू अपने आँचल से पोछकर ) तौ ये यहाँ नाँय रहिबे की, सखी एक घड़ी धीरज धर जब हम चली जाँय तब जो चाहियो सो करियो।
चंद्रा०---अरी सखियो मोहि छमा करियो, अरी देखौ तो तुम मेरे पास आईं और हमने तुमारो कछू सिस्टाचार न कियो। ( नेत्रों में ऑसू भरकर हाथ जोड़कर ) सखी, माहि छमा करियो और जानियो कि जहाँ मेरी बहुत सखी हैं उनमैं एक ऐसी कुलच्छिनी हू है।
संध्या और वर्षा---नहीं नहीं सखी, तू तो मेरी प्रानन सों हू प्यारी है, सखी हम सच कहैं तेरी सी सॉची प्रेमिन एक हू न देखी, ऐसे तो सबी प्रेम करै पर तू सखी धन्य है।
