पृष्ठ:बुद्ध-चरित.djvu/१४२

(७७)

पै बढ़ि सुंदरि एक साँ एक लखाति अनेक हैँ पास परी।
मोद में माति फिरै अँखियाँ तहँ रूप के राशि के बीच भरी;
रत्न की हाट में दौरति ज्योँ मणि तें मणि ऊपर दीठि ढरी,
लोभि रहै प्रति एक पै जौ लगि और की ओर न जाय ढरी।

सोवतीं सँभार बिनु सोभा सरसाय, गात
⁠आधे खुले गोरे सुकुमार मृदु ओपधर।
चीकने चिकुर कहूँ बँधे हैँ कुसुमदाम,
⁠कारे सटकारे कहूँ लहरत लंक पर।
सोवैं थकि हास औ विलास सोँ पसारि पायँ,
⁠जैसे कलकंठ रसगीत गाय दिन भर।
पंख बीच नाए सिर आपनो लखाति तो लौँ
⁠जौ लौँ न प्रभात पाय खोलन कहत स्वर।

कंचन की दीवट पै दीपक सुगंधभरे
⁠जगमग होत भौन भीतर उजास करि।
आभा रंग रंग की दिखाय रहौँ तासाँ मिलि
⁠किरन मयंक की झरोखन सोँ ढरि ढरि।
जामें है नवेलिन को निखरी निकाई अंग
⁠अंगन की, वसन गए हैं कहूँ नेकु टरि।
उठत उरोज हैं उसासन सोँ बार बार,
⁠सरकि परे हैं हाथ नीचे कहूँ ढीले परि।