पृष्ठ:प्रेमघन सर्वस्व भाग 1.djvu/४६३

—४३७—

करत नित ही नित नहीं नहीं, नहीं मालूम परत कछु-मन
की तेरे कौन ठान ठानी जानी॥
श्री बद्रीनारायन कह दे-हाँ हंस कर हमने मानी॥१०८॥

⁠अरे नटखट निरदई दई॥टेक॥
कुटिल कटीली डारिन हित फूलन गुलाव पठई।
⁠नहिं चन्दन से तरु हित सुमनावलि सरस विकास बनई॥
कर हरचन्द मन्द चन्दै छबि छाजत छीन छई,
⁠दमकावत दुति दूनी कर छुद्रन तिलसी तरई॥
लोभी मूढन धन दानी बुधजन दीनता भई,
⁠प्रेमी रसिक जनन वियोग सठ सुमुखि संयोग सई॥
लखि अबिबेक अनेक अनीतिन यह जिय जान लई,
⁠समझि न परति प्रेमघन तेरी रचनि आचरज मई॥१०९॥

चाल पलटत नित नई नई॥टेक॥
लखियत जामा पाग न पटुका झगा न मिरजई,
⁠घड़ी कोट पतलून बूट टरकी टोपी डटई॥
कर तलवार तुपक भाला सर कमर कटार कई
⁠अब तो काफ़ी है एक बेत छड़ी बारनिश भई॥
रही बीरता ऐंड सूर सामंतन की इतई,
⁠घँसि साबुन सुरमा मिस्सी बालन सी मेहरई॥
नहिं वह धर्म कर्म न ज्ञान, तप, योग जाप जपई,
⁠अब तो बैर कपट छल मिथ्या पातक बेलि बई॥
तब को कहं वह तिलक सुमिरनी चौका चक्कर छूत छई;
⁠अब तो मद्यपान होटल संग भोजन बिसकुटई।
नारिन की सारी कुर्ती चोली लौं छीन लई,
⁠पहिनावत हैं गौन मेम कर इसकूलन पठई।